ГРАН-ПРЫ Ў ЮНАГА ПІЯНІСТА З СЯННА

З перамогай вярнуліся навучэнцы Сенненскай дзіцячай школы мастацтваў з VII Адкрытага фестывалю-конкурсу фартэпіяннай музыкі «Музычныя іскрынкі», што праходзіў у г.Клецку Мінскай вобласці.

Гэты конкурс праводзіцца з мэтай выяўлення і падтрымкі таленавітых юных музыкантаў, развіцця іх творчых здольнасцяў, павышэння ўзроўню выканальніцкага майстэрства, папулярызацыі дасягненняў сусветнай і беларускай фартэпіяннай музыкі.
«Музычныя іскрынкі» вядомыя і папулярныя таксама за межамі Беларусі. Прадэманстраваць свае здольнасці ў Клецк прыязджаюць дзеці з Расіі і Эстоніі.
На сёлетні музычны форум з’ехаліся 165 юных талентаў з самых розных куткоў рэспублікі. Нягледзячы на ўзрост, у многіх з іх за плячыма ёсць перамогі ў рэспубліканскіх і міжнародных конкурсах. Выступленні доўжыліся тры дні, падчас якіх кожнаму ўдзельніку належыла выканаць праграму з трох твораў беларускіх і замежных кампазітараў.
Сенненская ДШМ на «Музычных іскрынках» была прадстаўлена ўпершыню. І гэты дэбют аказаўся больш чым удалым. Віртуозную і эмацыянальную ігру навучэнца 5-га класа Вані Квашко журы ацаніла найвышэйшай узнагародай. Юны піяніст з Сенненшчыны атрымаў Гран-пры фестывалю-конкурсу.

Адоранасць, чысціня выканання, трапяткое стаўленне да музыкі… Суддзі не скупіліся на пахвалу ў адрас юнага сенненца. Між іншым ацэньвалі выступленні піяністаў лаўрэаты міжнародных конкурсаў, стыпендыяты Спецыяльнага фонду Прэзідэнта Рэспублікі Беларусь па падтрымцы таленавітай моладзі А. Палякоў (старшыня), А. Вінель і выкладчык кафедры спецыяльнага фартэпіяна і кафедры педагогікі, гісторыі і тэорыі выканальніцкага мастацтва Беларускай дзяржаўнай Акадэміі музыкі І. Аношка. Адзначана на конкурсе выступленне і яшчэ адной ураджэнкі нашага раёна Машы Кузьмініч. Навучэнка 4-га класа ДШМ узнагароджана Дыпломам фестывалю.
Талент, памножаны на стараннасць і працалюбства — вось галоўныя складнікі поспеху. Безумоўна, ён быў бы немагчымым без выкладчыка Сенненскай дзіцячай школы мастацтваў па класе фартэпіяна Ірыны Готлібаўны Корсакавай, якая свае веды і майстэрства шчодра ўкладвае ў развіцце прыродных творчых дадзеных сваіх падапечных. Яе плённую работу з вучнямі на конкурсе ацанілі Граматай. Падтрымку ва ўсім аказваюць і бацькі выхаванцаў.
Для юных піяністаў Сенненшчыны паездка на фестываль-конкурс фартэпіяннай музыкі «Музычныя іскрынкі» — першая на вялікім, хочацца спадзявацца, творчым шляху. Наперадзе іх і іншых таленавітых выхаванцаў школы мастацтваў чакае нямала конкурсаў. Пажадаем жа нашым сенненскім зорачкам ярчэй іскрыцца на музычным небасхіле.
Вольга БАНДАРЭВІЧ.
Р.S. І чарговая радасная навіна не прымусіла сябе доўга чакаць. Пакуль матэрыял рыхтаваўся да друку, стала вядома, што Ваня і Маша занялі прызавыя 2-е і адпаведна 3-е месцы ў Міжнародным музычным Інтэрнэт-конкурсе ў Сербіі. З чым іх і віншуем!

На здымку: Ваня Квашко трымае ў руках свой галоўны прыз — хрустальную статуэтку ў выглядзе крышкі раяля, побач стаяць Маша Кузьмініч і выкладчык па класе фартэпіяна Ірына Корсакава.
Фота аўтара.