Юные исследователи Сенненщины собрались на днях в СШ№2 г. Сенно
Сёлета райцэнтр адзначае юбілей — 575-годдзе з даты першага згадвання ў летапісах. Гэтай знакавай падзеі прысвечаны рэгіянальны краязнаўчы праект “Мой край — мая Сенненшчыны”. Адным з яго цэнтральных мерапрыемстваў стаў краязнаўчы злёт школьнікаў,
Больш за 30 навучэнцаў з 11 устаноў адукацыі сабраліся ў СШ №2 г.Сянно, каб падзяліцца вынікамі сваіх даследванняў па вывучэнні культурнай, прыроднай і гістарычнай спадчыны малой радзімы. Рабоце секцый папярэднічала лінейка. Урачыстым момантам яе стаў вынас сцяга Сенненскага раёна. Словы віншаванняў і падтрымкі ў адрас юных краязнаўцаў выказала метадыст па выхаваўчай рабоце аддзела адукацыі, спорту і турызму райвыканкама Галіна Жыгунова. Звяртаючыся да падрастаючага пакалення, яна падкрэсліла, што без ведання гісторыі сваёй малой радзімы немагчыма стаць сапраўдным патрыётам Беларусі.
Доследныя работы былі прадстаўлены ў пяці намінацыях: “Мае знакамітыя землякі”, “Мая сям’я — мой гонар”, “Гісторыка-культурная і прыродная спадчына майго раёна”, “Мы шануем герояў імёны” і “Гісторыя аднаго музейнага экспаната”. Кожнае выступленне суправаджалася мультымедыйнай прэзентацыяй. Юных дакладчыкаў падтрымлівалі іх кіраўнікі з ліку настаўнікаў.
Для многіх удзельнікаў злёту падобнае даследванне — першы “навуковы” досвед у іх жыцці. Аднак нягледзячы на юны ўзрост даследчыкаў, падыходы для ацэнкі іх работ былі выпрацаваны самыя сур’ёзныя. У першую чаргу журы, у складзе якога былі настаўнікі гісторыі, супрацоўнікі раённага гісторыка-краязнаўчага музея, педагогі раённага цэнтра дзяцей і моладзі і інш., ацэньвала навізну і аўтарскія пошукі. Недастаткова прадставіць агульна вядомую інфармацыю з падручнікаў, энцыклапедый і іншых адкрытых крыніц, важна адлюстраваць сапраўды невядомыя старонкі гісторыі малой радзімы, суаднесці іх са знакавымі падзеямі ў жыцці краіны. А такіх каштоўных знаходак, унікальных фактаў і жыццёвых гісторый, як засведчыў злёт, у запасніках школьных музеяў захоўваецца нямала. Усё гэта павінна стаць набыткам шырокага кола насельніцтва раёна,у тым ліку і праз публікацыі краязнаўчых матэрыялаў у раённай газеце “Голас Сенненшчыны”, упэўнены адзін з членаў журы Аляксандр Бараноўскі. Для сённяшніх школьнікаў ён — лепшы прыклад таго, як захапленне можа перарасці ў справу ўсяго жыцця: у школьныя гады Аляксандр таксама быў у шэрагу юных краязнаўцаў, а цяпер з’яўляецца магістрантам гістфака ВДУ імя П.М.Машэрава.
Вынікі раённага злёту былі падведзены падчас урачыстай лінейкі. Пераможцы былі вызначаны ў кожнай намінацыі. Подзвігу партызанкі, настаўніцы Какоўчынскай школы Ганны Ляшко прысвяцілі сваю работу васьмікласнікі Какоўчынскай ДССШ Анастасія Гаравец і Дзмітрій Кавалеўскі. Тэму лёсу чалавека ў Вялікай Айчыннай вайне працягнулі пяцікласнікі Яўген Капітонаў і Дзмітрый Хлышчанка з Ульянавіцкай ДСБШ, якія даследвалі маючыя ў школьным музеі дакументы партызанскай сям’і Гаралёвых. Невядомыя старонкі з біяграфіі знакамітага ўраджэнца Сенненшчыны, беларускага паэта Тадэвуша Лады-Заблоцкага раскрывала Вераніка Кішковіч з Машчонскай ДССШ. З культурнай спадчынай вёскі Канстантова пазнаёміла журы і ўдзельнікаў злёту адзінаццацікласніца з Машканскай ДССШ Вікторыя Стук. А вось Назарыя Сірэнка, вучаніца 8 класа СШ №2 г.Сянно, прасачыла, якія традыцыі святкавання старажытнага абраду дажынак існавалі ў яе радаводзе. Шэраг аўтараў адзначаны дыпломамі другой і трэцяй ступеняў, а таксама падзякамі.
Вольга БАНДАРЭВІЧ.
Фота аўтара.