Эксклюзивные сувениры к новогодним праздникам подготовили сенненские мастера

супрацоўнік раённага Дома рамёстваў У. Квашко з лялькамі-козачкамі, якія зрабіла народны майстар Т. Кучынская.

 У майстроў раённага дома рамёстваў кіпіць работа па вырабе сувенірнай прадукцыі. Шырыцца і асартымент магазіна-салона «Сенненскія сувеніры», створанага пры культурнай установе.

На продаж тут прапануецца нямала адмысловых тавараў, зробленых у розных тэхніках дэкаратыўна-прыкладнога мастацтва. Увагу прыцягваюць разнастайныя падушачкі, керамічныя вырабы, насценныя кампазіцыі для афармлення інтэр’еру, вышываныя і тканыя рэчы, работы з дрэва і скуры, маляўнічыя карціны, вытанчаныя вырабы з саломкі. Гасцей Сеннен­шчыны абавязкова зацікавіць прадукцыя з рэгіянальнай сімволікай.

«Кожны раз імкнемся, каб нашы работы былі адметнымі, непадобнымі на ранейшыя, адлюстроўвалі традыцыйныя напрамкі народнай творчасці, якія бытавалі на Сенненшчыне, утрымлівалі ў сабе мясцовыя матывы», —  расказвае Вольга Квашко, дырэктар установы.

Сёння невялікі калектыў Дома рамёстваў падрыхтаваў больш за 200 сувеніраў. Асаблівае месца сярод іх належыць, канешне, сімвалам надыходзячага года — Казе і  Авечцы. У якіх варыянтах яны толькі не прысутнічаюць на рамесных прылаўках: амулеты, пано, свіс­тулькі, аўтарскія цацкі і інш. Пры такой разнастайнасці ўстрымацца ад пакупкі — задача амаль невырашальная. Тым больш, што цэны дастаткова прымальныя. Вось і ў маёй сумачцы неў­забаве апынулася бялюткая жывёліна з добрай авечай мордачкай, пашытая з мяккай навобмацак шарсцяной тканіны. У навагоднюю ноч цацка абавязкова зойме ганаровае месца пад ёлачкай. Астролагі прагназуюць, што 2015-ты будзе спрыяльным годам, бо каза і авечка невыпадкова асацыююцца з дабрынёй і шчырасцю. А каб усе вашы надзеі спраўдзіліся, абзавядзіцеся эксклюзіўным сувенірам ад сенненскіх майстроў.

Вольга  БАНДАРЭВІЧ.