«Голасу Сенненшчыны» – 105 гадоў
Ужо ў наступным месяцы раённае выданне адзначыць юбілей.
Бадай, ні ў якім дакуменце не захавана так падрабязна гісторыя Сенненшчыны, як на старонках газеты. Тут жыццё рэгіёна і яго жыхароў. Газета па праве лічыцца сапраўдным летапісцам раёна, сведкам і непасрэдным удзельнікам падзей, якія адбываюцца і ў краіне.
«Голас Сенненшчыны» – адно са старэйшых друкаваных выданняў у Віцебскай вобласці. Першы нумар выйшаў у друк 1 мая 1918 года пад назвай «Весткі выканкама». Тады гэта было выданне выканаўчага камітэта, Савета рабочых, сялянскіх і салдацкіх дэпутатаў. Мяняўся час і газета мяняла імя: «Факел», «Бальшавіцкая трыбуна», «Шлях да камунізму», «Знамя Ільіча», «Ленінская іскра». З 1991 года выданне носіць сваю цяперашнюю назву «Голас Сенненшчыны».
Газета беражліва захоўвае традыцыі, закладзеныя ранейшымі пакаленнямі журналістаў. Не спыняецца на дасягнутым. Дзякуючы прафесійнай рабоце калектыву, газета ўсебакова аператыўна асвятляе грамадска-палітычнае, сацыяльна-эканамічнае, культурнае, спартыўнае жыццё раёна. Газета застаецца сувязным звяном паміж насельніцтвам і органамі ўлады.
За доўгія гады сваёй гісторыі «Голас Сенненшчыны» заваяваў заслужаны аўтарытэт у сваіх чытачоў. Калектыў ганарыцца тым, што ў яго было і ёсць шмат сяброў. Вялікі дзякуй усім тым, хто застаецца з намі.
Нягледзячы на такі вялікі ўзрост, газета ідзе ў нагу з часам. Не толькі з тэкстамі працуюць журналісты. Новыя тэндэнцыі прымушаюць асвойваць іныя напрамкі працы. У прыватнасці, падачы відэакантэнта, дзякуючы чаму цікавасць да выдання праяўляе і моладзь. Наш канал на YouTube PROрегион і акаунт на платформе TikTok golas_senno даўно палюбілі сенненцы.
Героямі відэаматэрыялаў выступаюць жыхары раёна. Калі ласка, запрашаем да супрацоўніцтва: усе жадаючыя могуць выступіць ідэйнымі натхняльнікамі чарговай замалёўкі.
Мы прапаноўваем нашым падпісчыкам успомніць іх знаёмства з раёнкай, альбо павіншаваць выданне са 105-годдзем – можна ў вершаванай альбо празаічнай форме. Тэлефануйце, пішыце, мы абавязкова надрукуем, а таксама размесцім вашы пажаданні ў нашых сацыяльных сетках.
Ала ЯКАЎЛЕВА.
